هذي اسباب فشلنا بالدراسة 2024.

علشان تعرفون ليه حنا فاشلين

*المرحلة الابتدائيه

توك ورع ومبسوط تبي تدرس مثل اخوانك

مادري ليه مستعجل على رزقك ياما بتشوف في المدرسه من بلاوي

اول يوم لك في المدرسه بكاء وصياح وطق من الشايب

ودخلت المدرسه غصبا عليك

هنا تكون اول مصيبه المدير والمدرسين مسوين فيها حنونين

يقدمون لك كيك يابس تقعد ساعه تعرشه كنك تعرش عظم

هذا غير عصير البرتقال المنقلب لونه واول مره اشوف عصير

فيه زبد مثل هذا ماقول منتهي تاريخه الكذب خيبه

اقول ماعليه تاريخ ولا له شركة مصنعه

بعدها تقتنع بمصيرك الماساوي

تدرس ماشاءالله كلك اناقه ورقه

تشاكيل خشبيه وشنطة نعمان وثوب مخصر وكبوريا

لكن فصلك الزلايب مايساعدون

تدخل الفصل ضنك انهم مثلك ماتدري

في الكراسي المتقدمه في الفصل

تلقا شلة المخاطين واجهة الفصل

يعني كل ماطالت مخطانتك كلما تقدمت في الفصل اكثر

وحافظت على مكانتك في المقدمه

الكراسي الوسطانيه هنا تجيك شلة الاذاني المصديه

تلقا في اذنه عصفور معشش عنكبوت برعص ميت

عادي المهم ماتجي في المكان هذا الا واذنك فيها شى
الموضوع الأصلى من هنا: http://bayt.el-emarat.com/#11341#post87462
الموضوع الأصلى من هنا: http://bayt.el-emarat.com/#showthread.php?p=87462

الكراسي الاخيره شلة القراد والقمل

هنا تشوف تسريحات وصبغات من دون صبغه سبحان الله

يعني من قو صنكة راسه تلقا شعره بني

هذا غير القراد خبري القراد يجي في المعزا

لكن هنا اكتشفت موطنه الاصلي وانه يهاجر للمعزى في الشتاء عن طريق هالشعور

تبداء المعاناه

من اول الى رابع ودك تشيل الكرسي وتحط مرحاض

من رابع الى سادس ودك انهم مايلبسون شراب

يعني باختصار ودك تسد خشمك ولا تقول ياهني من اللي مايعرف حاسة الشم

*المرحله المتوسطه

على بالك كبرت مالومك

شيبو فيك حقين الابتدائي

هنا يبداء الخراب

ربعك يدخنون الا انت قويه بحقك

لازم تدخن وين في الحمام

شعار حقين المتوسطه

اعتبر الحمام بيتك الثاني

ناس تقعد في الحمام اكثر من الفصل

يالله العلم نور حتى لو كان في الحمام ههههههههههههههههه

طبعا حقين المتوسط تحسنت اشكالهم

مما هم عليه في الابتدائي

يعني

الكراسي الاولى طبعا محجوزه للمصاريه وعيال كفلاء المصاريه

الكراسي المتوسطه هنا يجونك شلة الجرب والنميمه وكل الهوشات من تحت روسهم

الكراسي الاخيره تلقا واحد اسويد ماتشوف الاشماغه وحاط بنت البكار

لايغرك شكله تحسبنه كمخه في البدايه لا ذا مصيبه ومحرك الفصل في الخفاء

والاشكال هذي فايده عضماء مع الطلعه في الهوشات

واحيانا يستخدمون لاغراض القنص

انتبه منهم وحاول تكسب رضاهم بشتى الوسائل

يعني باختصار المرحله هذي ياتنحرف وتترك المدرسه ياتستمر في الحمام سوري في الفصل

*المرحله الثانويه

الحين وصلت للرجوله وعرفت تسوق ماشاءالله عليك

حتى ابوك قعد يعطيك دتسن الغنم صاير تكانه

هنا رجعت شوي من الصنكه حقت الابتدائي

ونظام الثانويه ماله حل ثالث

يعني يانظيف يامصنك

ياحلو ياشبهه

يابيض ياسود

ومن ناحية المصنكين اغلبهم في الشرعي

ماعلينا

نجيهم في الفصل ونشوفهم

الكراسي الاولى حقت الحلوين والكشخات انتبه تحرش فيهم

ترا وراهم رجال ذولي

الكراسي اللي في الوسط حقين اصحاب دداسن الشد

يمتازون بزبيرات كعب مصنوعه من فضلات الماشيه شلون تجي هذي انا اقولك

ابوانهم ماعطوهم السيارات حب يعني الصبح دراسه والعصر عند الغنم

يعني لاتستغرب نداءاتهم في المدرسه يابو صنان يابو ريحه شئ مالوف عندهم

بالعكس هذا يعتبرونه واجب وطني وافتخار لهم

الكراسي اللي في الاخير هذولي هم الرجال اللي ورا الصفوف الاولى

تلقاهم ناس ذابحهم الجفاف ومتوقف نموهم الا نمو الشعر عندهم بس انظف من حقين الابتدائي

يمتازون بكثرة الحركه والمفردات الغريبه يعني جريات جريات وتلقاه يحرك يدينه تقول مسجل هدف

وراح تلاحظ ان النطق عنده في اليدين مو في اللسان يعني لو مافيه حركه بايدينه ينخرص

ياختصار المرحله هذي ياترفعك فوق ياتنزلك تحت

مو بالنسبه لا من اللي فيها ولاتحطون شى في ذمة الحكومه خ3

ننتقل الحين لاشياء متعلقه في جميع المراحل

** الطابور **

عاد مدرس الرياضه يموت في الطابور لان محد يعبره من المدرسين

ولا يثبت وجوده الا هنا يعني تحس ان له صوت ومستعد يسوي المستحيل

علشان الطابور تلقاه يغيب في الحصص لكن الطابور تفحط ماغاب عنه

يجيك مايشوف الدرب ومن مفرداتهم

ارفع يدينك التمرين الاول:تنهبل عاد انت وش فيك ياخي ليه تبي تشوف الحنا قولي عادي

وضرب الله لايوريك ارفع وتلقاك رافع السروال معاد تشوف الدرب تبي الفكه

واحد اثنين ثلاثة اربعه:وافلقني ان عدو اكثر من هل الارقام ولا عرف وش راها

استعد استريح:اللي يشوفك يقول داخلين ميدان عسكري وماخذين مدرستكم للجبهه

**المقصف **

ذابحك الجوع ياعزتي لك حاسس بمعانتك

الله لايوريك طابور المقصف ماودك تدخله ياما راح فيه من هتك للمشاعر الحساسه

وان وصلك الدور انتهت الفسحه

واذا مانتهت تقول ليتها صفرت لحم مفروم ولا جبن وبيبسي كندادراي

اللحم المفروم صاير حصا بدال ماتاكله ودك تسوي خلطة خرسان

الجبن ماضنتي ان جبنهم من مشتاقت اللبان شكله من مشتاقت البلك

يعني يبي لك شاكوش وتكسر فيه وتحشيه في الصاموله

الصاموله مادري وش اقولكم عجرا يبي لك دريل علشان تفتح بطنها هذا غير التشحيم

كندادراي اكذب عليك لو قلت مشروب غازي يمكن مطهر يمكن زيت سوبر شل

مادري لكن لاتهور وتشربه ذا سم مؤقت

**المصلى**

شوي ويكفرونك يجيك المدير يقولك كبر ماتدري وش تسوي تكبر عشر مرات تقول تصلي العيد

تبي الفكه ومالك الا هل الحل

ياعيني على فرشة المصلا ريحة قطو ميت من اركان الصلاة السجود هنا يا تشيل هالركن ولا تصلي وتكتم انفاسك

خلصت من الصلاة تناظر ورا ثوبك تلقاه كله سعابيل من استهبال اخوياك في الصلاة تحس انهم جايين من شات ابو سعبوله

وش تسوي امرك لله ودك تجمع صلاة الضهر مع العصر ولا تشوف هل الاشياء

**الملعب**

5×5 م ترابي كله حصا وصفا اضاهر كانو ينقبون عن البترول قبل يحطونه ملعب

هذا غير اني سامع من مدرس الرياضه ان غزوة الخندق صايره فيه

تخيل ثلاثين طالب في هل الملعب مافيه فرق اللهم العب وكسر

كلما مسكت الكوره اكثر تراك فنان لاتناول سجل لو في مرماك

قوانين الكوره هنا غير هنا بالعربي مالك صاحب غير الكوره

وان اقطعت منك اكسره يعني البس كنادر بوم ام حديد ولاتلبس كنادر ام لصق

علشان تضمن الاعاقه للي معه الكوره

**الاذاعة**

انسى تكلم في الاذاعه الا اذا كان ابوك مدير ولا مدرس شوفني

كل ماقالو اذاعة رفعت ايديني ورجليني ولا حولي احد

والمميز فيها ماتغير لو تموت تحس انها من مناهج وزارة التعليم

يعني مقدم الاذاعه وقراءن وكلمة الصباح وحكم والغياب

اما مقدم الاذاعه شايف نفسه على باله رزان مغربي

وهي هي ماتغير لا من ناحية الطلاب ولا الكلام اللي فيها

اللهم الحاجه اللي تغير فيها الغياب ودايم ينادوني فيه

**الوحده الصحيه**

ياخي لاعطوك ورقه لها كنهم معطينك ورقة تحويل للمستشفى التخصصي

وبصراحه اعتبره احسن شى في الدراسه كلها يعرفون يعالجون وادويتهم محترمه

لكن عيبه افحط ان عطوك عذر يابن الحلال انا مريض انسى لو تجيب له شهادة الوفاة

مايعطيك عذر لو تموت انت غبت اليوم بكره تدرس وانت ماتشوف الدرب

انشاءالله لو تدرس على تابوت ماعلينا منك

**تجربة شخصيه**

ريح نفسك وخش العسكريه مثلي ومالك ومال وجع الراس

اذا عندك طولت بال وتحمل كمل تعليمك

وانشاءالله يلاقي الموضوع اعجابكم رغمنه والله تعبني اكثر من موضوع الطلي

ثلاث ساعات وانا اكتب فيه

اخوكم سواق اللوري فدائي الخليج

مو من كتابته من شيل البلاوي اللي فيه

يعني كان فيه ملخص عن الحمامات

اظطريت اني اشيله خفت لانشال انا وموضوعي وياه

ولا هنت يالحسة

وثنك يووووووو فور يور ربلي